രാജ്യത്തെ ടോൾ വരുമാനം റെക്കോർഡ് ഉയരത്തിൽ; ഒക്ടോബറിൽ പിരിച്ചത് 6,640 കോടി രൂപ

ടോൾ ബൂത്തുകളിൽ പണമിടപാടുകൾ പൂർണ്ണമായും ഒഴിവാക്കുന്നതിനായി സർക്കാർ കർശന നിരീക്ഷണമാണ് ഏർപ്പെടുത്തിയിരിക്കുന്നത്. പണമിടപാട് അവസാനിപ്പിക്കുന്നത് ക്രമക്കേടുകൾ ഇല്ലാതാക്കാൻ സഹായിക്കുമെന്ന് ഉദ്യോഗസ്ഥർ ചൂണ്ടിക്കാട്ടുന്നു

ന്യൂഡൽഹി: രാജ്യത്തെ ദേശീയപാതകളിലെയും എക്സ്പ്രസ് വേകളിലെയും ടോൾ പിരിവ് ഒക്ടോബറിൽ എക്കാലത്തെയും ഉയർന്ന നിരക്കായ 6,640 കോടി രൂപയിലെത്തി. മുൻവർഷം ഒക്ടോബറിൽ ലഭിച്ച 5,715 കോടി രൂപയെ അപേക്ഷിച്ച് 16 ശതമാനത്തിന്റെ വർദ്ധനവാണ് രേഖപ്പെടുത്തിയിരിക്കുന്നത്. രാജ്യത്തെ റോഡ് ശൃംഖലയിലൂടെയുള്ള വാഹനങ്ങളുടെ ഗതാഗതം ഗണ്യമായി വർദ്ധിച്ചതാണ് വരുമാനത്തിലെ ഈ റെക്കോർഡ് കുതിപ്പിന് കാരണമായതെന്ന് റിപ്പോർട്ടുകൾ വ്യക്തമാക്കുന്നു.

ടോൾ പ്ലാസകളിലെ പണമിടപാട് രീതികളിലും വലിയ മാറ്റമാണ് ദൃശ്യമാകുന്നത്. കഴിഞ്ഞ വർഷം ഒക്ടോബറിൽ 84 കോടി രൂപയായിരുന്ന നേരിട്ടുള്ള പണമിടപാട് ഇത്തവണ വെറും 4 കോടി രൂപയായി കുറഞ്ഞു. അതേസമയം, ഒരു വർഷം മുൻപ് പൂജ്യമായിരുന്ന യുപിഐ വഴിയുള്ള ടോൾ പിരിവ് ഒക്ടോബറിൽ ഏകദേശം 100 കോടി രൂപയായി കുതിച്ചുയർന്നു. ഡിജിറ്റൽ പേയ്‌മെന്റ് സംവിധാനങ്ങൾ ജനപ്രിയമാകുന്നതിന്റെ സൂചനയാണിത്.

ടോൾ ബൂത്തുകളിൽ പണമിടപാടുകൾ പൂർണ്ണമായും ഒഴിവാക്കുന്നതിനായി സർക്കാർ കർശന നിരീക്ഷണമാണ് ഏർപ്പെടുത്തിയിരിക്കുന്നത്. പണമിടപാട് അവസാനിപ്പിക്കുന്നത് ക്രമക്കേടുകൾ ഇല്ലാതാക്കാൻ സഹായിക്കുമെന്ന് ഉദ്യോഗസ്ഥർ ചൂണ്ടിക്കാട്ടുന്നു. കൂടുതൽ യാത്രക്കാർ ഫാസ്ടാഗ് വാർഷിക പാസുകളിലേക്ക് മാറുന്നതും ഇലക്ട്രോണിക് ടോൾ സംവിധാനങ്ങളുടെ വ്യാപനവും പണത്തെ ആശ്രയിക്കുന്നത് കുറയ്ക്കാൻ സഹായിച്ചിട്ടുണ്ട്.

അതേസമയം, 2025-ൽ വാർഷിക പാസുകൾ അവതരിപ്പിച്ചതിനെത്തുടർന്ന് നടപ്പ് സാമ്പത്തിക വർഷത്തിന്റെ ആദ്യ ആറുമാസങ്ങളിൽ (ഏപ്രിൽ-സെപ്റ്റംബർ) ആകെ ടോൾ ഇടപാടുകളുടെ എണ്ണത്തിൽ 5.2 ശതമാനം കുറവുണ്ടായി. മുൻവർഷം ഇതേ കാലയളവിൽ 225 കോടിയായിരുന്ന ഇടപാടുകൾ 213 കോടിയായാണ് കുറഞ്ഞത്. എന്നാൽ ആകെ വരുമാനം 6.27 ശതമാനം വർദ്ധിച്ച് 42,971.82 കോടി രൂപയിലെത്തി. 2025-26 സാമ്പത്തിക വർഷത്തിൽ ആകെ 82,900.61 കോടി രൂപയായിരുന്നു രാജ്യത്തെ ടോൾ വരുമാനം.

Content Highlights: Toll revenue from national highways and expressways reached a record ₹6,640 crore in October, up 16% year-on-year

To advertise here,contact us